Santa Lussia
Santa Lussia tanto bona,
anca st’ano l’è rivà
a sveiarne su Verona
co i bancheti de la Bra
e portarghe i regaleti
par le case ai buteleti.
E la Bra l’è ‘na belessa
co’ i bancheti sul Liston
‘ndo, fra el ciasso e la pienessa,
se fa su ‘na confusion
che te mostra gran ciassona
sta simpatica Verona…
Gh’è de tuto sui bancheti:
pue de tute le misure,
tamburei, cavai, s-ciopeti,
bale mole e bale dure,
e, a tiron sora i cordoni,
alti dindola i baloni…
No parlemo de naranse
o de mandolato bianco:
sora questo, i è le usanse,
bisòn spendarghelo un franco;
denti o sensa, magna o leca,
bisòn torghene ‘na steca!
Lì, davanti a ‘sti bancheti,
quei che vende, sbraja e sìga,
e le mame coi fioleti
le contrata, le fadiga
par comprarghe quel che i vol
ma par poco… se le pol.
I morosi va a brasseto:
ela ride, lu ‘l gà ‘l muso:
forsi ‘l pensa al regaleto
che ghe impone da far l’uso:
cissà cossa ‘l pagaria
se ‘l podesse… scapar via!
Fra do file longhe e bele
de bancheti ben destesi,
sempre alegre, sempre quele,
le maraje veronesi
se sparpaja par la piassa,
se imboressa, ride, ciassa.
Signorine, giovanoti,
tuti in sambre, gira a spasso,
e con trombe e con sioloti
i va a gara a far del ciasso;
i studenti g’à la piva
che più alti… no’ i ghe riva!
La Via Nova la me par
el baril de le sardele
e, fra tuto quel urtar,
lo riceve le putele
lo refila el giovinoto
qualche… mezo pissegoto…
Ma no importa: co ‘sto ciasso
Santa Lussia, tanto bona,
no la guarda, serto, in basso,
ma la guarda sta Verona
tuta alegra, tuta bela
tuta in gringoli par Ela…
Angelo “Angelin” Sartori